Soil bank-ah chauh leivûng paih turin CM-in NHIDCL hotu a hrilh

Chief minister Lalduhoma chu nimin khan a pisaah National Highway & Infrastructural Development Corporation Limited (NHIDCL) executive director Vivendra Takhar nen an inkâwm a; CM chuan, leivûng paihna (soil bank)-ah chauh leivûng paih tur leh ramngaw leh nungcha himna ngai pawimawh turin a lo hrilh.

CM Lalduhoma chuan, NHIDCL hotupa chu kawng an siam mekah kawngin a paltlang khaw chhung kawngte ngai pawimawha hna hmasaa nei ṭhin tura a duh thu a hrilh a, "Soil bank atana hmun thlanah chauh leivûngte paihin, ramngaw leh nungchate himna chu ngai pawimawh hle ang che u. In soil bank-ahte duhdah taka leivûng hnâwl khawm emaw, hnâwl liam emaw mai loin, mawi tak leh mám takin ûm zui u la, park atan pawha hman zui tlâkin siam tum ang che u," a ti.

NHIDCL hnathawh mek tikhaihlak thei thil a awm a nih chuan chak taka bawhzui tur leh sorkar pawhin theihtawpa a puih tur thu sawiin Lalduhoma chuan, "Ramin hma a sawn zel theih nan kawngpui ṭha kan mamawh a, in hnathawhte a ṭhain a rintlak ngei tur a ni," a ti bawk.

Vivendar Takhar chuan Lalduhoma chu CM a nihnaah lawmpuina a hlan a; kawngpui siamnaa an hmalakna tlangpui a hrilhfiah. CM-in a ngaih pawimawh a sawite chu tihhlawhtlin ngei an tum tur thu a sawi.