Bank ṭangkai theih dan tur sawiho

Indian Chamber of Commerce leh Ministry of DoNER hnuaia North Eastern Council-te chuan nimin khan Aijal Club-ah Mizoram mipui tam zawkin bank an hman ṭangkai theihna tur sawihona, 'Round Table Interaction on Financial Inclusion - Enriching the lives of people of Mizoram' an buatsaih.

Sawihonaah hian Mizo mipui tam zawkin bank an hman ṭangkai theih dan tur ruahmanna hrang hrang an siam a, bank rintlak leh dàwr nuam nih a pawimawh thu leh sorkar laipuiin thingtlang zawka chengte tana ruahmanna a siamte chu a hlawhtlin dan tur leh bank mawhphurtute sawiho a ni. Bank dawr kawnga mipuite'n harsatna an tawh ṭhinte sutkian dan tur sawiho a ni bawk.

Round Table Interaction hi Aizawl district additional DC John LT Sanga'n a kaihruaia, Indian Chamber of Commerce regional director Ishantor Sobhapandit-a'n a telpui. Mizorama bank hrang hrang 20 aiawhte an tel a ni.