Myanmar aṭanga kuhva rah dan loa lut che vêl reng reng man tur - Home Secretary

Home secretary H Lalengmawia chuan nimin khan district hrang hrang bawrhsapte chu biak hmuhna (video conference) kaltlangin Krismas leh kumthar atana an inbuatsaihna leh ráltlânte dinhmun a sawipui a; Myanmar aṭanga kuhva rah dan loa lut che vêl reng reng man vek tur a nih thu a sawi.

H Lalengmawia chuan, ruihhlo leh dan loa thil lak luh chungchangah sorkar a khauh hle tih a sawi a, "A bik takin Myanmar aṭanga kuhva ro lo lut a ngai thutak a, a che vel reng reng man vek tur tih a ni a, Police Headquarters lam pawh hriattir an ni tawh. Champhai, Kolasib leh Mamit bawrhsapte'n hemi chungchangah hian mawhphurhna an nei lian hle a ni," a ti.

Sorkar thuchhuahin a tarlan danin, December 18, 2023 dinhmun angin Mizoramah Manipur raltlan mi 5,998 an awm a, Myanmar raltlan mi 22,607 an awm bawk. Myanmar raltlan zingah hian Aizawl district-a awm zat tarlan tel a ni lo a; Bangladesh aṭanga raltlan awm zat tarlan a ni lo bawk.

Home Secretary chuan, bawrhsapte chu MLA inthlanpui tluang leh felfai taka an kaihhruai avanga a lawmpui thu a sawi a; Krismas leh kumthar vuakvêtah mipuite'n rálmuang tak hnuaia hlim leh lawm taka an hman theih nan nasa takin ṭan la turin a chah.

Hunpui atana district-te inbuatsaihna a ṭha hlea a hriat thu sawiin Lalengmawia chuan, mipui ṭawiawmna a pawimawh avangin khawtlang leh tlawmngai pawl hruaitute nen thawhhona ṭha tak nei tur leh boruak chhia (air pollution) leh ri bengchheng awm lo a nih theih nan hma la turin a chah a ni.

MIZORAMA RALTLAN AWM ZAT
(December 18, 2023 dinhmun)

▶ Aizawl district-a relief camp 13-ah Manipur ráltlân mi 796 an
awm mek.
▶ Lunglei district-ah Manipur ráltlân mi 62 leh Myanmar raltlan mi 2,000 an awm.
▶ Siaha district-ah Manipur raltlan mi 59 leh Myanmar raltlan 5,900 an awm mek.
▶ Champhai district-ah Manipur raltlan mi 407-te'n chhungte leh ṭhian ṭhate bèl a; Myanmar raltlan mi 12,484 awm zinga 6,014 chu refugee camp-ah an awm.
▶ Kolasib district-ah Manipur raltlan mi 2,971 an awm a, an zinga 586 chu relief camp pakuaah awmin, mi dang zawng chu chhungte leh ṭhian ṭhate bèl an ni.
▶ Serchhip district-ah Manipur raltlan mi 105 leh Myanmar raltlan mi 343 an awm a, relief/refugee camp awm tawh loin, chhungte leh ṭhian ṭhate an bèl.
▶ Lawngtlai district-ah Myanmar raltlan mi 305 an awm mek.
▶ Mamit district-ah Manipur raltlan mi 164 leh Myanmar raltlan mi 365 an awm.
▶ Saitual district-ah Manipur raltlan mi 1,327 awmin an zinga 127 chu relief camp pariatah an awm.
▶ Khawzawl district-ah Manipur raltlan mi 107 leh Myanmar raltlan mi 109 an awm mek.
▶ Hnahthial district-ah Manipur raltlan an awm loa, Myanmar aṭanga raltlan mi 1,101 an awm.
Source: IPR Press Release