BJP MLA-te'n Amit Shah an kâwm

Mizorama BJP MLA pahnih - Saiha bialtu Dr K Beichhua leh Palak bialtu K Hrahmo te chuan December 18, Thawhṭanni khan Union Home minister Amit Shah an kâwm a; Mizoram mamawhte thlenin, kawng engkima Mizoram pui turin an ngen.

Union Home Minister chuan, BJP-in Siaha district-ah MLA pahnih an nei chu lawmawm a tih thu a sawi a, Dr K Beichhua leh K Hrahmo chu lawmpuina a hlan.

Amit Shah chuan, prime minister Nadrendra Modi kaihhruai sorkarin hmarchhak state-te a ngaih pawimawh thu sawiin, "Mizoramin BJP MLA pahnih a neih avangin a hma aia nasain kawng engkimah duhsak a ni ang. Puih an ngaihna apiangah central sorkarin a pui dawn," a ti.

Dr K Beichhua leh K Hrahmo hian December 18 leh nimin khan Union Minister of Earth Sciences Kiren Rijiju, Union Minority Affairs minister of state John Barla, Union Home Affairs minister of state Ajay Kumar Mishra leh BJP National president JP Nadda te an kâwm a ni.