Hachhek biala kuhva chíngtute'n nn harsatnate CM-ah an thlen

Hachhek Bial Kuhva Chingtu Pawl (HBKCP) hruaitute chuan tun hnai khan chief minister Lalduhoma a pisaah an kâwm a, kuhva chíngtute harsatna tawh ṭhin a reh theih nan hma la turin an ngen.

HBKCP hruaitute chuan, kuhva hralhnaa harsatna an tawhte CM hrilhin, "Kan kuhvate hi Assam lama a luhnaah pick-up trip khat zelah gunda tax Rs 8,000 kan chawi mek hi India khua leh tui kan nih angin, free taka a kal theihna atan Assam thuneitute hnenah leh central lamah hma min laksak turin kan ngen a che," an ti.

Eizawnna atana an hman mek kuhva hralhna chungchangah dan loa kuhva tawlh rûkin a tihbuai thu tarlangin HBKCP chuan, "Myanmar, Thailand leh Indonesia aṭanga dan loa lo lut kuhva ro leh kuhva hringte hi tihtawp ni se," an ti a, Mizorama dan loa lut kuhva awm mekte pawh tihral ni se an duh thu an thlen a ni.

HBKCP THU THLEN DANGTE

■ Kan kuhva tharte min hriatpui a, certificate of origin kan neih theihna tura hma min laksak tur leh Mizoram sorkar leh HBKCP-te thawk duna market ṭha zawk kan hmuh theihna tura hma min lakpuia thawh dun ni se. Hemi atan hian study team sorkar lam leh kut hnathawktute aiawh din ni se.
■ Kuhvate natna laka vên dan tur leh hlâwk zawka kan thar theih nan Agriculture department-in hma min lakpui se.
■ Kuhva hnah hmanga siam paper plate tam zawk sorkar hmalaknaa siam dan ngaihtuah ni se.
■ Minimum support price siam tawh sa aieng, sawhthing, hmarchate ang bawk hian kuhva pawh hi minimum support price min siamsak turin kan dil a che.