CM leh MPF hruaitute an inkâwm : 'Project Monitoring Committee remtihna loin contract hun pawhsei a theih dawn loh' - CM

Chief minister Lalduhoma chuan nimin khan a pisaah Mizoram People's Forum (MPF) General Headquarters hruaitute a kâwm. CM chuan, Project Monitoring Committee an din dawn a, an remtihna lo chuan contract hnathawh hun pawhsei leh contract man ennawnte a theih dawn loh tih a sawi.

CM Lalduhoma chuan, Project Monitoring Committee an din turah political party (ECI recognise) tin aiawh te, MPF, MKHC leh pawl dang aiawhte an tel dawn thu a sawi a, "A ṭul angin thiamna bik neite pawh an awm ang. State level aṭanga village level thlengin din a ni dawn a, he committee remtihna lo chuan contract hnathawh hun pawhsei te, contract man ennawn (revised)-te a theih tawh dawn loh," a ti.

Ruihhlo, kuhva rah leh dan loa bungraw tawlh rûk awm ṭhinte tihtawp tumin hma an la dawn tih sawiin Lalduhoma chuan, "Zu leh ruihhlo vanga chhungkua leh khawtlanga buaina siam chíngte thleng hian sorkar chuan a ûm zui zel dawn," a ti a; investment policy an duan mek thu leh, chumi hmanga ram dang company lian tak takte hîp luh an tum dante a sawi.

Chief Minister chuan, MPF chu inthlanna thianghlim a awm theihna lamah chauh ni loin, sorkar thianghlim leh lang­tlang a awm theihna tura an ṭha­hnem­ngaihnate inthlahrung loa sorkar hotute hrilh turin a chah a; sorkar ṭha, langtlang leh eirukna awm lo sorkar din tura hmalakna an kalpui ṭan dan leh hmachhawp an neihte a sawi bawk.

MPF general secretary Rev. Lalram­­liana Pachuau chuan, "MPF-in sorkar laka kan beisei ber chu sorkar ṭha, sorkar langtlang leh eirukna awm lo sorkar neih a ni a, chu'ngte chu i hnena rawn thlen turin kan rawn kal a ni," tiin, sorkar kal dan tura an beiseite a sawi a; "Kan theihtawpin sorkar kan thlâwp zel dawn a, hun rei lo te chhungin a ṭha zawnga thil inthlak hmuh tur a awm hi a phûrawm hle a ni," a ti.