Quarry chimah mi 3 an thi

Nimin chawhnu dar 1 vel khan Pukzing rama lung lâkna quarry a chim a, hna thawktu hnam dang (vai) pathum an thi a, nizan dar 9 thleng khan an ruang lak chhuah theih a la ni lo.

Quarry awmna ram neitu Zathanga hnen aṭanga thu dawn danin, quarry hi West Phulpui leh Pukzing inkar kawngpui chhak lama awm a ni. Mi pathum a chhilhte chu Hitachi excavator enkawltute niin, Rajasthan lam mi pahnih leh Silchar lam mi pakhat an ni a, SLT company hnuaia thawkte an ni.

Quarry chim hi a zauh tham avang leh excavator leh mihring chhilhtu lung a len hlawm avangin an ruang lak chhuah theih a la ni lo a; nimin tlai lam khan lei/lung min haitu tur khawl dang Aizawl aṭanga a kal chauh avangin lak chhuah theih hun tur sawi theih a ni lo.