Thlawhna chuan man tihniam turin ngen

Lok Sabha MP C Lalrosanga chuan December 19, 2023-a New Delhi-a Development of North Eastern Region (DoNER) Ministry Consul-tative Committee ṭhutkhawmah Mizoram leh hmarchhak state ṭhenkhata thlawhtheihna chuan man to lutuk tihniam turin sorkar laipui hotute a ngen.

C Lalrosanga chuan, thlawh-theihna chuan man chungchangah airline-te'n Mizoram bika chuan man an tito vak vak chu khualzinte tan phurrit nasa tak a nih thu a sawi a, "Aizawl leh Delhi inkar chuan man phei chu a sang tawh hle a ni," a ti a; awmze neia thlawhtheihna chuan man bituktir tur leh thunun turin Civil Aviation Ministry hotute a ngen a ni.

Sorkar thuchhuah tarlan danin, DoNER minister G Kishan Reddy chuan Mizoram MP thusawi chu a ṭâwmpui a, hmarchhak bial tan bik thlawhna chuan man tihtlemtir dan ngaihtuah turin ṭhutkhawma tel Civil Aviation hotute a hrilh.

Mizoram MP C Lalrosanga hian Lengpui Airport-a thawhtheihna ṭumhmun (runway) siamṭhat chungchangah re-carpetting phahna tura senso ṭulte tum turin DoNER Ministry hotute a ngen bawk.

Ṭhutkhawmah hian C Lalrosanga chuan, Sairang aṭanga Hmawngbuchhuah thlenga rel kawng siamna tur final location survey lâk a ni dawn ta chu lawmawm a tih thu a sawi a; bawhzui chak turin Railways thuneitute a ngen bakah, Bairabi-Sairang inkar rel kawng siam hna pawh chak taka thawh zel a ṭul
thu sawi.

Mizorama national highway siam mekte kum khat chhunga hna thawh theih hun chhung hrethiam leh chhût chunga NH lei laih leh paihna hnate thawh a ṭul thu te, fûr ruahtui tlain kawngpui siam hna a tihkhaihlak leh tihchhiat ṭhin dante hre chunga hna thawk thiam turin DoNER hotue a ngen a; Ministry of Road Transport and Highways hnuaia hnathawk company leh contractor-te hriattir turin a ngen nghal a ni.

Railways hotute chuan, Sairang thlenga rél kawng siam chu October 2024-ah zawh hman tum a nih thu an sawi.