Sum tihchingpen vangin CADC hotute táng turin Court-in a hrem

Rs 49,31,420 (nuai 49.31) tihchingpen vanga thiam loh chantir tawh Chakma Autonomous District Council (MADC)-a hotu ṭhin mi pariat chu kum li ṭheuh jail-a táng tur leh Rs 2,00,000 ṭheuh chawi tura hrem an ni.

Mi pariat hrem dan tur hi Aizawl District Court-a special judge (Prevention of Corruption Act) Dr HTC Lalrinchhana chuan nimin khan a puang a; mi pariatte chu kum li ṭheuh tang tur leh Rs 2,00,000 ṭheuh chawi tura tih an ni bakah, pawisa an chawi loh chuan kum hnih dang tàn belh turin Court chuan a ti bawk.

Tarlan tawh angin, kum 2003-a CADC inthlana Vaseitlang bial aṭanga MDC thlan tlin Buddha Lila Chakma chu ban a nih hnuah kum 2008 khan High Court-in thiam a chantir a, MDC aṭanga bàn a nih chhunga a chanvo hlohte pe leh vek turin a ti. CADC chuan kum 2018 khan Buddha Lila Chakma chu Rs 63,34,914 pek turin a rêl.

Buddha Lila Chakma-a'n CADC (Salary, Allowances and Pay of Members) Rule, 2003 anga a dawn theih chu Rs 14,03,494 a nih laiin, CADC-in Rs 63,34,914 a pek chhuak a; an pek chuanna Rs 49,31,420 chu tihchingpen a ni tih hmuh chhuah a ni. Hei vang hian thiam loh chantir an ni a; Buddha Lila Chakma erawh chu October 10, 2023 khan a thi a, a thubuai tihtawp a ni.

Mi pariatte chu PC Act Section 13(2) leh IPC Section 409 hnuaiah thiam loh chantir an ni a; thubuai chi hnihah hian kum li ve ve zel táng ṭheuh tur leh Rs 1,00,000 zel chawi tura tih an ni. Thubuai pahniha an tàn hun tur chu hun khatah a kal kawp dawn a, kum riat tang loin, kum li ṭheuh an táng dawn. An pawisa chawi tur erawh chu kal kawp loin, a hranpain a kal dawn a, thubuai pakhatah Rs 1,00,000 ṭheuh chawi tur an nih angin, thubuai pahnihah chuan Rs 2,00,000 ṭheuh an chawi dawn a ni.

Special Court chuan hrem an nih chhan sawifiahin, sum an khawih chingpen zat a tam thu te, CADC chhunga chengte leh mi chhumchhiate hamṭhatna atan court rorelna kaltlangin ADC inrêlbàwlna siamṭhat a ṭul hle thu te, mipui aiawha thlan tlinte'n an thuneihna an hmansual fo ṭhin chu tawmimtir a ṭul thute a tarlang.
Hrem tak zinga mi Shanti Jiban Chakma chu CADC-a chief executive member hlui a ni a, mi dangte pawh MDC hlui an ni hlawm.