KHAWTHLIR
KTP-in thisen pe
KṬP, Sihhmui Branch chuan nimin khan Synod Hospital Blood Bank-ah thisen pek an huaihawt a, mipa 11-in thisen an pe.
Car insúah mi 1 thi
Nimin tlai dar 3 vel khan Lunglei Pukpui dáiah Lunglei pana tlan Kwid car MZ-02 B-0282 leh Aizawl lam pana tlân Eon car MZ-01 Q-9015 an insû a, Eon car khalhtu Rosiama (43), Lunglei Venghlun chu Christian Hospital panpui a nih laiin a hliam tuar loin a thi. Car pahniha chuang mi dang pali, Lunglei mi vekte pawh hliam mah se, ngaihtuahawm an ni lo nia thu dawn a ni.
Sahuan khâr dawn
Aizawl Zoological Park (Sahuan) chu Krismas leh kumthar 2024 vuakvetah December 24-26, 2023 leh January 1-2, 2024 chhung khàr a ni dawn a, Pathianni-ah pawh khar a ni ang.
Hotute inkâwm
Tourism minister Lalrinpuii chu December 19, 2023 khan Ministry of External Affairs joint secretary Vanlalvawna'n a pisaah a hmu a, lawmpuina a hlan. He hunah hian Tourism secretary Dr Lalrozama, joint secretary V Lalengmawia leh department hotu dangte an tel a; Mizoramin tourism industry-a hma a sawn theih dan turte sawiho a ni.
Pisa luah lut
Adviser to chief minister (finance) TBC Lalvenchhunga, MLA chuan nimin khan Chief Minister's Office-a a pisa a luah lut a, Chief Minister thuràwn petu tur a nih dawn avangin ngaihtuahna fim tak an hman thiam a ngai dawn tih sawiin, thil an tihsual lohna tura ṭawngṭaipui turin kal khawmte a sáwm.
MCU-in kâwm
Mizoram Consumers Union (MCU) Hqrs. hruaitute chuan December 19, 2023 khan Taxation minister Dr Vanlalthlana leh Food, Civil Supplies & Consumer Affairs minister B Lalchhanzova te an pisa ve veah an hmu a, lawmpuina an hlan. Dr Vanlalthlana chuan, ṭhahnemngai taka mipui rawngbawl zel tur leh mipui ṭhatna tur a nih chuan puih zel a inhuam thu a lo hrilh a; B Lalchhanzova pawhin MCU hruaitute chu sorkar nen chak taka thawh dun a ṭul thu a hrilh bawk.
MLA-in concept note thehlut
Saiha bialtu MLA Dr K Beichhua chuan nimin khan Union Minority Affairs minister of state John Barla chu a pisaah a hmu a, Maraland Gospel Centenary Hospital (ECM Hospital) thar sakna tur project concept note a thehlut. Dr K Beichhua chuan, ECM Hospital building thar sakna tura concept note a thehluh thu tarlangin, "Project hi cheng nuai 3,000 man niin, PMJVK kaltlanga thawh tur a ni. He hospital thar kan neih leh theih chuan kan district hi health indicator-ah nasa takin hma kan sawnpui ngei ang tih hi ka beiseina a ni," a ti.
Hmalakna sawiho
Saitual District Coordination Committee chu nimin khan an chiarman Dr Lalngura Tlau, bawrhsap hoin an ṭhukhawm a; agriculture sector, LSWC sector, horticulture sector, AH&Vety sector leh DMU-FOCUS hnuaia activity report 2023-24 an thlirho. Bawrhsap chuan, thlai thar awm angte khawtual mite'n hnianghnâr zawka an hmuh theih nan hmun danga thawn mai loin, tualchhunga lei theihin awm se a duh thu a sawi.
Khapna thupek lekkawh dan tur rêl
Kolasib bawrhsap John LT Sanga hoin nimin khan Krismas leh kum thar vuakveta dan leh thupek kenkawh dan tur leh, hâlpuah, hâlmawi leh ruih theih thil khuahkhirh dan tur sawiho a ni a; dan leh thupek kengkawhtute chu an mawhphurhna ṭheuhah ṭan la tlâng tur leh eng emaw thil thleng palhah hma la nghal thei tura inring reng turin a chah.