National Mathematics Day hman a ni

Mizoram Science, Technology & Innovation Council (MISTIC) leh Mizoram Mathematics Society (MMS) chuan nimin khan Mizoram Rural Bank auditorium-ah National Mathematics Day an hmang a, Planning & Programme Implementation department secretary Lalmalsawma Pachuau khuallian a ni.

Inkhawm hi Directorate of Science & Technology chief scientific officer H Lalsawmliana'n a kaihruai a; Mizorama science lam kaihhnawih pawl te, Planning department mi te, SCERT-a Science Promotion Wing hotu te, Mizoram Remote Sensing Centre leh Mizoram Science Centre mite an tel.

Mizorama mathematics professor hmasa ber Prof. LP Lalduhawma leh mathematics-a Ph.D hmu thar mi paruk hnenah chawimawina hlan a ni a; 15th Mathematics Competition-a level hrang hranga zirlai ti ṭha zual mi 40 hnenah lawmman sem a ni. Pachhunga University College-a assistant professor Dr Mohan Khatri-a'n Mathematics Day chungchang a sawi bawk.

Khuallian Lalmalsawma Pachuau chuan, zirlai kal khawmte chu lehkha an zirnaah zirlai awmzia tak tak hre loa zirna, blind by-heart system kalsan a, application based-a inzir turin a chah a; mathematics chu competitive exam leh zirna sang zawkah thil ril zawka ngaihtuah theihna - objective thinking leh analytical skill petu ber a nih thu a sawi. Mizoram maia duh tâwk lo a, India ram pum huap inelnaa hming chher tum turin zirlaite a fuih bawk.

Inkhawmah hian MISTIC scientific officer Dr Davy Lalruatliana'n National Mathe-matics Day puala hun an hman dante a sawi a; MISTIC principal scientific officer Samuel Lalmalsawma'n thu a sawi bawk.