Winter Wonderland Christmas Fair ṭan

Labour, Employment, Skill Development and Entrepreneurship department chuan nimin khan Dawrpui Multipurpose Hall-ah Winter Wonderland Christmas Fair vawi hnihna an buatsaih ṭan a, LESDE secretary Lalramsanga Sailo-in a hawng.

Winter Wonderland Christmas Fair 2023 hi LESDE department leh sorkar laipuia Ministry of Micro, Small and Medium Enterprises (MSME) ṭang dun buatsaih a ni a; Mizoramah kutkawih eizawnna lam buaipuitute thil siam zawrhna tura tih a ni.

Fair-ah hian dawr 60 a awm a, thawmhnaw, ei leh in, Krismas thil kaihhnawih, thilpek tur chi, thil cheimawina, puan leh thiamhnang hmanga deh chhuahte zawrh chhuah a ni a; vawiin leh naktukah chhunzawm a ni ang.

Winter Wonderland Christmas Fair hawnna inkhawm hi LESDE director Angela Zothanpuii'n a kaihruai a; khuallian Lalramsanga Sailo chuan, micro/small business enterprise-te chu ram economy siamṭhatna atana dinhmun pawimawh tak chelhtu, mipui mamawh petu leh mi dangte eizawnna siamsaktu an nih thu a sawi a, Fair chu an hlâwkpui ngei theih nan duhsakna a hlan a ni.