MAHCO-in mamawhte CM-ah thlen

Mizoram Apex Handloom & Handicraft Cooperative Society Limited (MAHCO) Board of Directors member-te chuan nimin khan chief minister Lalduhoma a pisaah an kâwm a, MAHCO hmalak dante leh hmachhawpte an sawipui bakah, an mamawhte an thlen.

MAHCO chairman Lalrinkima chuan, an dinhmun tlangpui leh harsatna an neihte a sawifiah a; hmalakna tura project siamte sorkar laipui lama a luh thlak ve zel theih nan Mizoram sorkarin lo pawmpui ṭhin se an duh thu a sawi.

Chief Minister chuan, a bial chhungah puantaha eizawng an tam avangin MAHCO harsatnate thui tak a hriatthiampui thu a sawi a; puantahtute hmasawnna turin sorkarin hma a la nasa dawn tih sawiin, an harsatna leh an dinhmunte, hmalak zel an tum dante chu ziaka pe turin a lo hrilh. Hlawhtlin ngei tuma ruahmanna an siamte a theih ang anga bawhzui a inhuam thu a sawi bawk.