MLA-in sorkar hotute a kâwm

Tuichang bialtu MLA W Chhuanawma chuan nimin khan a bial chhunga Khawzawlah sorkar hotute a kâwm a; "Sorkar hnathawkte'n ruling party hruaitute hlauhna nei lo se ka duh," a ti.

W Chhuanawma chuan, sorkar thil tum leh ngaih pawimawh piah lam, ni tin inrêlbàwlnaah sorkar hnathawkte dan chêp an tum loh thu a sawi a, "Sorkar office-te'n sorkar aṭanga hamṭhatna dawng tlâka an ngaih chu rintlakah kan ngai dawn. Chief Minister duh dan angin sorkar hnathawkte chu zalenna zau tak pek ka duh a, sorkar hnathawkte'n ruling party hruaitute hlauhna nei lo se ka duh," a ti a; Mizoram sorkar thar chu ram rorelnaah tawnhriat nei tlem a nih avangin finchhuah ṭhin turin kalkhawmte a chah.

Khawzawl DC meeting hall-a ṭhut-khawm hi bawrhsap K Lalrohlua'n a kaihruai a; W Chhuanawma hian Khawzawl Zuchhipa Chhanchhuahna Home hnenah Krimas pualin ṭanpuina Rs 12,000 leh Grace Camping Center hnenah Rs 10,000 a hlan. MLA-a thlan tlin a nih lawmna puala Faina Hnatlangpui buatsaihah a tel bawk.