Viksit Bharat Sankalp Yatra sawiho

Sorkar laipuia Ministry of Health & Family Welfare additional secretary V Hekali Zhimomi, YBSY changtu hoin nimin khan Secretariat conference hall-ah Mizoram sorkar hotute an ṭhukhawm a; sorkar laipui scheme-te mipui hnena zirtirna leh inziah luhna tura hmalakna Viksit Bharat Sankalp Yatra (YBSY) chungchang an sawiho.

V Hekali Zhimomi chuan, sorkar laipui scheme-te inzirtir tam a pawimawh thu sawiin, "Eizawnna kawngah te, hriselna lam te, sum khawl leh deh chhuahna kawng hrang hrangah sorkar laipuiin department hrang hrang kaltlangin mipui tan hamṭhatna scheme chi hrang hrang a kalpui mek a, ṭangkaipui tam tak an awm laiin hmang ṭangkai thei leh mamawh ve ngawih ngawih, inzirtir ṭhat loh vanga scheme a awm tih pawh hre lo an awm avangin VBSY kalpui a ni," a ti.

Central scheme-te inzirtirna ngawrh thei ang bera kalpui turin India rama state leh union territory tinah Information, Education & Communication (IEC) van tirh a nih thu Zhimomi chuan sawiin, "A bik takin hmun kilkhâwr zawkte ngaih pawimawh a ni," a ti a; tribal-te tana sorkar laipuiin a ngaih pawimawh zual zinga tel - Eklavya Model Residential School enrolment tam zawk neih te, scholarship scheme leh Van Dhan Vikas Kendra-te chu inhrilh tam a ṭul thu a sawi.

VBSY hi MLA inthlanpui vangin Mizoram, Chhattisgarh, Madhya Pradesh, Rajasthan leh Telangana state-ahte state/UT dang aiin ni 30-in ṭan tlai a ni a; January 26, 2024 thleng kalpui tur a ni.