CM aṭanga ṭanpuina sem

Chief Minister's Discretionary Grant aṭanga ṭanpuina sum pek chhuahte chu nimin khan Saiha leh Serchhip bawrhsapte'n an district chhunga damdawi-in, home leh centre-te hnenah an hlân.

Siaha DC Lalmuansanga Hnamte chuan a pisaah Chief Minister's Discretionary Grant kaltlangin Maraland Gospel Centenary Hospital, Kalvari Healing Ministry, Orphanage Boys' Home, Grace Children's Home, District Hospital leh Observation Home hnenah Krismas thil pek a sem. Bawrhsap chuan Krismas leh kumthar hunpui thleng turah Siaha mipuite duhsakna a hlan a, chhungkaw tinte duhsakna chibai a bûk a ni.

Serchhip DC David Lalthantluanga pawhin a pisaah Chief Minister Discretionary Grant 2023-24 aṭangin Serchhip district-a Zoar Urban Deprived Children’s Home, Unity Orphanage Home, Serchhip Observation Home, Shalom Special School, Old Age Home, Adult Rehabilitation Center leh Civil Hospital hnenah Krismas thilpek atan ṭanpuina pawisa a hlan a ni.