Home Minister-in ramrî a tlawh; Ramrî kan ngai pawimawh - HM

22nd December, 2023

Home minister K Sapdanga chuan nimin khan Kolasib district-a Mizoram leh Assam ramria Mizoram police duty-te a tlawh kual a; Mizoram sorkarin ramri himna an ngaih pawimawh thu a sawi.

Home Minister hian Saiphai, Saihapui-V, Buarchêp, Vairengte dái, Aitlang, Phaisen leh Bairabi Zophaia police duty-te a tlawh a, ramri vengtute dinhmun a enfiah. Home secretary H Lalengmawia, DIG (Armed) Lalnunmawia, Home joint secretary Lalthiamsanga Sailo, Kolasib DC John LT Sanga leh Kolasib SP Lalrinawma Traite ten an ṭawiawm a ni.

K Sapdanga chuan, Mizo ram leh hnam himna tura nunna thàpa duty sipaite a chhuàn thu sawiin, "Hmun khawharthlak takah kan ram leh hnam him nan indaih lo tak chungin in khawsa a, kan hre reng che u. He lai hmuna rinawm taka in duty avangin in chungah lawmthu ka sawi tak meuh a ni," a ti.

Home Minister chuan, police-te chu an hnathawh avangin boruak muanawm tak Mizoramin a nei tih sawiin, lawmawm a tih thu a sawi a, "Mizoram sorkar thar hian ramri himna a ngai pawimawh hle," tiin, ram himna tura thawktute chu a theih ang anga thuam chak zel an tum thu a sawi.

Ruihhlo a hluar thu sawiin Minister chuan, "Kan ṭhalaite a suat nasa hle. Ruihhlo do kan ngaipawimawh hle dawn a, ruihhlo luhna kawngte a theih ang anga dangchat a, ruihhlo laka ram chhanhim hi kan tihmâkmawhah kan ngai. Ramri depa awm khuate sorkar thâ tichak a, theihtawp min chhuahpui turin ka sawm a che u," a ti.

K Sapdanga chuan, ramri duty sipaite Krismas chibai bûkin, "Tun dinhmunah in tan tihsak theih che u nei tam rih lo mah ila, Krismas hlim taka in hman theihna turin Home department hmingin Krismas thilpek ka hlan che u a ni. Kan CM-in ni 100 chhunga kan tihtur a sawite a hlawhtlin ngei theihna turin chak takin hma kan la zel," a ti a, theihtawp chhuah turin a ngen.

Ramri chungchanga Mizoram sorkar dinna a la ngai reng tih sawiin Sapdanga chuan, "Ramria kan dinna chu Bengal Eastern Frontier Regulation (BEFR) 1875 a la ni reng. Ramri chungchang buaipuitu tur Boundary Committee din thuai kan tum ang. Anni rawtna leh thuràwn ang zelin ramri chungchangah chuan sorkarin ngaihtuahna a séng dawn," a ti.

Home Minister hian ramria duty-te hi Home department aṭangin Krismas an hmanna atan pawisa eng emaw zat a hlan ṭheuh a ni.