MJA-in hmun hnihah ṭanpuina an hlân

Mizoram Journalists' Association (MJA) General Headquarters chuan nimin khan hmun pahnihah MJA Charity Fund an hlân a, an member kum upa mi pakua hnenah Krismas thilpek an hlân bawk.

MJA Gen.Hqrs hian Krismas dawnah Charity Fund a khawn ṭhin a, mi harsate ṭanpuina turin MJA member-te'n sum an thawh khawm ṭhin. Kuminah pawh MJA member ṭhahnem takin pawisa an thawh khawm a, sum thawhtu zingah MJA member ni lo tlem azáwng an awm bawk.

Charity Fund-a hmuh sumte chu nimin khan hlan a ni a; Manipur-a Zo hnahthlakte ṭanpuina atan Zofa Global Mizo Council hnenah Rs 26,500 pek niin, Civil Hospital, Aizawl Charity Fund-ah Rs 50,000 an pe. Charity Fund hi MJA president C Lalrambuatsaiha'n a dawngtute hnenah a hlàn.

MJA President chuan, Aizawl Civil Hospital chu Mizoram mipui náwlpui, hmun hrang hrang awmte'n an pan khawm a nih thu sawiin, "He damdawi-in pantute zingah mi rethei tak tak an awm ṭhin a, chu'ng mite chu damdawi-ina thawkte'n damdawi leinate an tumsak ṭhin tih kan hria a, mi harsate ṭanpuina atan ṭangkai leh daihzai taka hman turin kan neih ang tâwk kan rawn thawh ve a ni," a ti.

Civil Hospital, Aizawl medical superintendent Dr Zoramthanga chuan, MJA-in an damdawi-in an hre ṭhin chu an lawm thu sawiin, "MJA nen kan thawhhona a ṭha a, MJA-in min duhsakna zawng zawngah kan lawm tak zet. Charity Fund in rawn pek hi damlo harsate tan ṭangkai taka hman a ni ang," a ti a; Poor Fund-a sum lutte chu hun bik awm loin a mamawh apiang tan hman ṭhin a nih avangin damdawi-ina awmte tana ṭanpuina pek rau rauah Poor Fund-a dah chu a ṭangkai zual thu a sawi.

Dr Zoramthanga chuan, Civil Hospital, Aizawlah doctor an indaih thawkhat a, nurse leh group-D staff erawh an indaih lo hle tih a sawi a; Civil Hospital-ah khum 300 a awm thu te, OPD-ah thla khatah mi 35,000 - 40,000 vel inentir an awm ziah thu te, ICU-ah khum 17 a awm mek thute a sawi bawk.