ECI-in Robert Romawia thiam a chantir
Election Commission of India (ECI) chuan sorkar term hmasaa minister of state Robert Romawia Royte chu MLA aṭanga bàn a nih theihna atana hêk a nihnaah thiam a chantir.
Robert Romawia Royte hian Office of Profit chungchangah Representation of People Act a bawhchhia nia ngaiin ZPM party-a Vigilance department chuan Ngursailova hmingin February 28, 2023 khan Mizoram Governor kaltlangin ECI-ah an hêk a ni.
Robert Romawia an hêkna chungchangah hian ECI chuan November 14, 2023 khan thutlukna (judgement) a siam tawh a, a thutlukna chu Mizoram Governor-ah thawnin, order tichhuak turin a hriattir a ni. Governor chuan ECI thupek angin December 14, 2023 khan order a chhuah a, Robert Romawia Royte thiam chantir a nih thu a tarlang.
Mizoram Chief Secretary pawhin Governor thupek angin Robert Romawia hêknaa thutlukna chungchangah hian nimin khan Mizoram Gazzette (Extraordinary) a tichhuak bawk.
ECI chuan, Robert Romawia Royte-in North East Consultancy Services (NECS) chu Business Transfer Agreement hmangin a fapa hnenah neitu nihna a pek vek avangin NECS leh sorkar thawhhonaah hmer tel theih a ni lo a, office of profit dan a kalh lo tih a tarlang.
ECI thutlukna chungchangah hian Robert Romawia Royte chuan, ZPM party mite'n an hêk avangin tu mah a huat phah lo tih sawiin, "A sawina tur dik tak ECI ngeia complaint an thehlut pawh kha a puitlinthlak ka ti. ECI thutlukna lang chhuak ta avang hian Mizote'n India Danpui leh a hnuaia dan tesêp nihphung dik kan hriat belh ngei ka ring," a ti a; Pathian chungah a lawm thu a tarlang bawk.