Mi thattu dam chhung táng turin hrem

Kumin May thlaa Chhiahtlang daia mi thattu Laldinthara (42), Khawruhlian Vengchung chu Aizawl District Court-a additional sessions judge Ngursangzuali Sailo chuan thiam loh a chantir a, dam chhunga jail-a táng tur leh Rs 10,000 chawi turin a hrem.

Thu dawn danin, May 15, 2023 zing dar 5 vel khan Chhiahtlang aṭanga Bûkpui luh hma kawngpui thlang metre 20 velah mipa ruang chhar a ni a, a hnuah Lalsangzuala (31), Mission Vengthlang a ni tih finfiah a ni. Tualthihna chhui turin police hotute chuan special investigation team (SIT) an din a, Serchhip SDPO Kaste Romalsawma'n a kaihruai.

SIT hian Aizawl police nen ṭang dunin May 17, 2023 khan pawikhawihnaa mawhphurtua puh Laldinthara, Khawruhlian nia inchhál chu Aizawlah an man. IPC Section 302 hnuaiah tualthah thubuai siamsak a ni a; Aizawl additional session judge Ngursangzuali Sailo chuan December 19, 2023 khan thutlukna puangin thiam loh a chantir a, December 20 khan hremna tur a puang leh bawk.

Laldinthara chu hrehawm taka dam chhung táng tur leh Rs 10,000 chawi tura hrem a ni a, pawisa a chawi loh chuan ni 90 dang tàn belh tura tih a ni.