Sinlung Hills Council CEM-in bànna a thehlut

Sinlung Hills Council (SHC) chief executive member (CEM) Lalthlamuana Hmar chuan nimin khan SHC Chairman hnenah CEM aṭanga bànna a thehlut.

Lalthlamuana Hmar hian a mimal thil avangin CEM aṭanga bànna thehlut a nih thu a tarlang a, SHC member atana a ruat (appointed member)-te pawh chawlhtir turin a ngen. SHC-ah hian member thlan tlin 12 an awm a, CEM-in member atan mi pahnih a ruat thei.

Hetih lai hian, SHC member ṭhenkhat chuan December 20, Nilaini khan CEM rin tâwk lohna (no confidence motion) an thehlut a, nimin khan no confidence motion hi ngaihtuah tura tih ni mah se, CEM a bàn tâk avangin ngaihtuah a ni lo.