PWD Minister-in hnathawh mek a tlawh

Public Works Department (PWD) minister Vanlalhlana chuan nimin zingah khan Tlawng lei dawh ṭhat mek leh Lengpui Airport sak ṭhat hna kalpui mek a enfiah a, "Sorkar kaltlanga in sak leh hmasawnna ruhrel dang siamte chu ṭha leh tlo a ni tur a ni," a ti.

Tlawng lei dawh ṭhat mek (steel arch - semi through bridge) chu sorkar laipui Ministry of Road Transport & Highways hnuaia thawh a ni a, Mizoram PWD chuan hmalakna vilin, contractor chu EPC Mode-in Poddar Infratech Pvt. Ltd. a ni. Lei dawh ṭhatna atan Rs 36,99,00,009 ruahman a ni a, kumin October thlaa zawh tura tih chu March 2024-a zawh turin hun pawhsei niin, 74.25% vel zo fel tawh anga chhût a ni.

Lei hi India rama inclined network arch bridge hmasa ber tur niin, metric ton 432 vela rit a ni dawn a, metre 100-a sei, metre 7.5-a zau leh a sáng lai berah metre 17-a sang a ni dawn. Lei bul Aizawl lamah kawng metre 180 a thui leh Lengpui lamah metre 265.300 a thui siam tum a ni bawk.

Lengpui Airport chei ṭhat hna chu hlawm hniha ṭhen a ni a; Renovation of Terminal Building chu SCA/SASCE sum cheng 2,764.83 hmanga thawh niin, contractor chu Zoramchhana a ni. Elevated Road with Connected components of Terminal Building chu NESIDS sum nuai 1,959 sênga sak a ni a, contractor chu KR Construction (Kamlova Chhangte/Kamrul Lashkar) a ni.

Minister Vanlalhlana chuan, hmasawnna ruhrel pawimawh tak zawh hun tur bituk baka hun pawhsei chu ruahmanna siam anga zawh thuai a nih theih nan ṭan la turin contractor-te a chah a, "Hna tlo leh ṭha, ram leh hnam tana chhawrnahawm tak siam a nih theih nan theihtawp chhuah ang che u. Sorkar kaltlanga in sak leh hmasawnna ruhrel dang siamte chu ṭha leh tlo a ni tur a ni," a ti.