END-in heroin gram 192.800 man
Excise & Narcotics department chuan December 20, Nilaini khan Champhai district-a hmun pahnihah heroin gram 192.800 (hawng 16) an man a, a kaihhnawihah mi pathum manin, The Narcotic Drugs & Psychotropic Substances Act, 1985 tlawhchhanin thubuai an ziak lut a, Champhai District Court-ah an hruai nghal.
Nilaini tlai dar 3:30 khan Zokhawthar kawng, Mualkawi dáiah END enforcement-te chuan heroin gram 35 (hawng 3) leh a neitu nia puh Tapi Ribiya (32), Siiro/Ziro, Lower Sabansiri district, Arunachal Pradesh nia inchhál an man.
Nilaini tlaia heroin an man kaihhnawihah Nilaini vêk zan dar 8:30 khan heroin gram 157.800 (hawng 13) an man leh a; a neitua puh Jayanta Barman (28), Barasakdal, Rakhalmari, West Bengal leh Mansiangsanga (18), Dinthar Veng, Champhai nia inchhálte an man bawk. Heroin an phurhna lirthei pawh hrèn nghal a ni.
Excise & Narcotics department hian kumin Krismas leh kumthar 2024 thleng tur pualin Mizoram pumah special drive an kalpui mek a, zin veivâkte himna turin lirthei khalhtute endikin, zu an in leh in loh an enfiah bakah, ruihhlo dang an phurh leh phurh loh an dap ṭhin.
December 20, 2023 khan Rangvamual leh Phunchawnga kawngpui kama ruihhlo ngai mi 11 chu camping/rehabilitation centre-ah an dah luh thu Excise & Narcotics department chuan an tarlang bawk.