KHAWTHLIR

Miniser-in hawng

Minister Dr Vanlalthlana chuan nimin zing khan a bial chhung Ramhlun North-ah YMA Chawngbawla Rûn chung sak zawm a hawng. In sakna atan MLA fund Rs 8,50,000 hman a ni. Minister chuan, a bial chhunga ṭhalaite zingah kutkawih eizawnna lama tui an awm chuan a ṭul anga hmalakpui a inhuam thu a sawi.

Pisa luah lut

Resource Mobilisation Committee vice chairman Haukhum Hauzel chuan nimin khan Old Secretariat building-a a pisa tur a luah lut. Haukhuma chuan, "I ram hian eng nge a tih sak theih che tih zawt suh la, ka ram tan eng nge ka tih theih tih inzawt zawk rawh, tih hi ka thupui tur a ni," a ti.

Quarry chim sawiho

Mamit District Disaster Management Authority chuan nimin khan chairman VL Remliana, bawrhsap hoin West Phulpui leh Pûkzíng inkara quarry chim chungchanga hmalak dan tur an sawiho a; quarry chimin a delh mi pathum ruang la chhuak turin a chak theih ang berin khawl leh mihring thâ hmanga hmalak ni se, an ti. Krismas hma ngeiin kawng tihtlang hman tura ṭan lâk a nih tur thu an sawi.

VBSY buatsaih

Lunglei khawpuia Zohnuai, College Veng leh Venglaiah nimin khan sorkar laipui scheme-te mipui hnena zirtirna leh inziahluhna, Viksit Bharat Sankalp Yatra buatsaih a ni. Health department aiawhte'n a duh apiangte tan blood pressure leh zunthlum an endik a, BPL chhungkuate tan golden card siam nghal a ni bawk.

Damdawi-in tlawh

Tuichang bialtu MLA W Chhuanawma chuan nimin khan a bial chhunga Khawzawl Hospital a tlawh a, damdawi-in dinhmun leh mamawhte a enfiah. MLA chuan, Khawzawl Hospital hmasawnna atan theihtawp chhuaha hmalak a duh thu leh hotu sang lama bawhzui ngai pawh bawhzui zel a tum thu a sawi.