Kawngpui siam tlo loh chhanah PWD-in lung ṭha tawk lo an puh

Mizoram PWD (High­way Division) chuan, Mizoram kawng­pui siam hrang hrang chhiat hma chhan langsar zual pali an tarlang a, chu'ng zingah chuan Mizorama lungte chu kawng siam nana tling pha a ni lo tih an tarlang.

Vanglaini-in RTI Act hmanga a zawhna PWD Chief Engineer Office (Highway) SPIO-in a chhan danin, Mizorama kawng siam chhiat hma chhanah Mizorama lung hmante chu kawng siam nana tling pha (standard quality) a ni loah an ngai a ni. 

RTI Act hmanga zawhna dang, kum 2019 chhunga Tuirial-Seling kawng siamna sum sen zat leh a hmanna kimchang zawhna chu PWD SPIO chuan, "Tuirial to Seling kawng NH-54 hi Central Ministry thu chhuak angin NHIDCL kutah handover a ni," tiin a chháng a ni.

1.    Ruahsûr nasa leh fûr rei lutuk chu kawng chhiatna pakhat a ni. Ruahtui tlain kawng chhuat tlem tê têa ti khi ṭanin, ruah tla lehte chuan chung khi chat chu rawn tizau zelin, kawng hnuai lei thuk zawk (base layer) thlengin a khawih chhe vek thei.

2.    Kan kawng siam nana hman ber lungte chu kawng siam nana tling pha (standard quality) kan nei lo em em a, a nih tur angin kawngte a ṭha tawk lo ṭhin.

3.    Estimate siam laia kawng dinhmun (condition)-te hi a taka siamṭhat a nih meuh chuan a chhe zual nasa tawh ṭhin a, chu chuan hna a tichhe ṭhin a ni.

4.    Motor kawngpui dunga lirthei kan sil mai ṭhin te, in sak­­na bungrua kan hlángthla mai ṭhinte leh cement concrete chawhna atan kawngpui kan hmang mai ṭhinte hi kawng chhiatna langsar zual a ni.