Dan loa thil tawlhrûk rêng rêng tihreh vek kan tum - Chief Minister

Thenzawla Police Training School-a police training zo, constable batch 69-na leh head constable (operator) batch 4-nate chu nimin khan Passing Out Parade neihpui an ni. Khuallian chief minister Lalduhoma chuan, kum tin chawh ruala police mi leh sa 100 chuang an thi ziah chu mutmawh hnàrmawha neih a ṭul thu leh dan loa thil tawlhrûk rêng rêng tihreh vek an tum thu a sawi.

Passing Out Parade neihpuite hi police ni tura compassionate ground-a lak an ni a, January 16, 2023-ah basic training ti turin PTS-ah an lut. A tirah chuan mi 284-in training an ṭan a, an zinga mi 13 chuan chhan hrang hrang vangin an ti zui zel thei lo a, a tawp thlengin mi 271 an awm a, mipa 155 leh hmeichhia 116 an ni.

CM Lalduhoma chuan, Mizoramah dan loa kuhva ro, ruihhlo leh rálthuam tawlh rûkte leh dan phal loh thil dang che vel a tam thu sawiin, "Heng thil ṭha lo tawlh vel rengte hi sorkar tharah hi chuan tihreh vek kan tum. Chu hna thawk tura kan kutke pawimawh ber chu nangni (police) hi in ni a, in inpekna leh in thawhrimna hmangin mi tam tak nunna humhim a, an tisa leh thlarau thlenga venhim sak kan tum a ni," a ti.

Lalduhoma chuan, police a nih ve tawh ṭhin avangin police dinhmun tam tak a hriatthiampui thu sawiin, "Police-te hi discipline a ṭha tur a ni. Kum tin maia chawh ruala mi 100 chuang kan thi ziah ṭhin hi mutmawh hnàrmawhah kan neih a ṭul. Ka chhinchiah sual loh chuan tun hnai kum sarih chhungin battalion khat vel zet, mi 861 lai kan thi tling a, a rapthlak lutuk," a ti a; police-te an zavaia an ṭan tlàn a duh thu leh hriselna ngaih pawimawh a ṭul thu a sawi.

Police training zo tharte chu an vanneihzia hre reng tura chahin Lalduhoma chuan, "In zingah duhsakna leh khawngaihna (compassionate ground)-a lak in awm tih ka hria a, ka lawmpui che u. Chhawr tlâk ni tura in ṭan mar a ngai. Kan ram tan service ṭha ber pek tur a ni," a ti a; mahni invawng a, hotute thu awih a, zu leh ruihhlo laka insûm tlat chung hna thawk turin a chah.

Chief Minister hian training zo thar police-te chu hlim leh hahdam taka Krismas leh kumthar an hman theih nan January 2, 2024 thleng chawlh a pe a; thu a sawi zawhah training-naa ti ṭhate hnenah lawmman a hlan.

Passing Out Parade-ah hian minister of state pahnih F Rodingliana leh B Lalchhanzova khualzahawm an ni a, DGP Anil Shukla pawhin thu a sawi. IGP (Hqrs) Lalbiakthanga Khiangte leh Serchhip DC David Lalthantluanga te pawh an tel a ni.