Kuhva rah tualchhunga thar ni loin Police gate a paltlang tur a ni lo - Home Minister

Home minister K Sapdanga chuan nimin khan Mamit district chhung ramria police duty-te a tlawh a; kuhva rah, Mizoram chhunga thar ni loin police checkgate a paltlang tur a ni lo tih a sawi.

Home Minister chuan, tun hnaiah Myanmar aṭangin kuhva ro mai ni lo, kuhva hring pawh Mizoramah phurh luh ṭhin a ni tih an hriat thu sawiin, "Tualchhung thar ni lo chuan police gate a paltlang tur a ni lo. Chutiang thil a awm chuan man vek tur a ni. Cabinet meeting thuchhuak a nih avangin hemi kawngah hian sorkar khawng hle a tum," a ti.

Pawisaa insiamrem vanga Mizoram thar ni lo kuhva rah tlang palh awm an hriat chuan a mawhphurtu chungah na takin action lak a ni dawn tih sawiin Minister chuan, "Dan hian a kawng a zawh a ṭul a, dan phal chin baka pawisa khawn te, mahni mimal hlâwkna tura uniform ha emaw ha lo emaw, tu mahin ramri leh a chhehvelah sorkar hriatpuina tel loin pawisa an khawn tur a ni lo," a ti a, sorkar revenue-a lut tur chin chu receipt tel thlapa khawn tur a nih thu a sawi.

Chief Minister-in ni 100 chhunga an tihhlawhtlin tur chiang taka a puan tawh thu sawiin K Sapdanga chuan, "Tihlawhtling turin theihtawp kan chhuah mek. Tunlaiin kan department, a bik takin police-te hian sawi neuh neuh kan kai viau mai. Ramri depa duty kan police-te'n sumdawng leh tualchhung thar kuhva hring phur chhuaktute pawisa lo lak kan ching ṭhin nia sawi a awm fo. Heng thil hi tun aṭang chuan a thleng tawh tur a ni lo," a ti.

Home Minister chuan, mipui veivakte'n harsatna an tâwk tur a ni lo tih sawiin, "Thlamuang taka an awm theihna tura ṭanpuitu tur kan ni. A ṭul a nih phei chuan tualchhung thar kuhva hring phurtute'n kan state chhunga harsatna an tawh lohna turin ramri thlenga a venhim hna thawh inhuam turin inbuatsaih a ṭul," a ti a, mipui harsatna siam zawnga khawsate chu sorkarin a enliam dawn lo tih a sawi.

Home Minister hi Home secretary H Lalengmawia, DIG C Lalnunmawia, Home jt. secretary Lalthiamsanga, Mamit DC VL Remliana leh Mamit SP Lalthang-puii Pulamte ten an ṭawiawm a ni.