Aizawlah No Vehicle Zone kalpui

Nimin khan Aizawl khawpuia Zodin Square leh Chanmari inkarah chawhma dar 10 aṭanga tlai dar 4 inkar chhungin No Vehicle Zone kalpui a ni a, vawiinah pawh kalpui leh a ni dawn.

Krismas a hnaih tawh avangin Aizawl Bazarpui a lûn hle a, mipui chhuakvâk an ṭhahnem a, lirthei tihbuai lohin zalên takin kawngpui dungah mipui an kal thei a ni. Mahni lirthei keng loa chhuak pawh ṭhahnem tak an awm a, hei vang hian No Vehicle Zone-in a huam loh kawngpuite pawh a thàwl phah nia thu dawn a ni.

Vanglaini palai zawhna chhangin Aizawl SP Rex Zarzoliana chuan, boruak a muanawm a, harsatna lian tham thleng a awm loh thu a sawi a; chutih rualin, dan loa thil zuar hnam dang man an awm thu a sawi.

Traffic SP Stephen Lalrinawma chuan zawhna chhangin, lirthei che vel chungchangah harsatna lian tham a awm lo tih a sawi a, "Main road hêlna kawng khawi emaw laiah traffic jam a awm ve a, harsatna lutuk awm loin kan chingfel zel thei a, kan lawm khawp mai," a ti a; chawhma lamah lirthei a tlem deuh a, chawhnu dar 1 vel aṭangin parking ruahmanah a khah vek tawh thu a sawi bawk.