Ṭanpuina sum official-a tangkhang hlen awm ṭhin a bo tawh tur a ni - CM

Chief minister Lalduhoma chuan, mipui hnena sorkar ṭanpuina sum thleng tur official lama tangkhang hlen ta a awm ṭhin nia an hriat thu sawiin, "Sorkar tharah hi chuan chutiang chu a awm tawh tur a ni lo a, chutiang tih chíng official-te chuan hremna an pumpelh lo ang," a ti.

Nimina Thenzawl Handloom Complex-a National Handloom Development Programme (NHDP) hnuaia puan tahna in sak ṭanpuina dawngtute hnena ṭanpuina pek inkhawmah Lalduhoma chuan, mipui hnena sorkar ṭanpuina sum thleng tur official lama tangkhang hlen ta a awm ṭhin chu a bo tawh tur a ni a, mipui hnena thleng tur chi chu a vaiin an (mipui) kutah a lut tur a nih thu a sawi.

Lalduhoma chuan, kum 1977 aṭangin Thenzawlah puan tah a ni tawh a, India ram pum hriat an hlawh tawh tih sawiin, "Hma lam kan pan zel ang. Vawiina in pawisa dawnte hi in dawn chhan ang taka hmang turin ka duh che u a, sorkarin a endik zui zel dawn. In hman dik loh avanga a hnu zela ṭanpuinain dawng zui thei ta lo a nih chuan in mawhphurhnaah kan ngai ang," a ti.

Khualzahawm F Rodingliana, Commerce & Industries minister pawhin thu sawiin, "Sorkarin bána kaih policy a kalpui tur hi 42% chu industry lam hawi a ni dawn," a ti a, hna thawktute thawh chhuah mumal taka bawhzuia hmasawnpui an tum viau thu a sawi.

Sorkar thuchhuah tarlan danin, CM hian Thenzawlah hian a mamawh apiang hman theih turin puan bànna kháwl a din a, in luah man leh bill dangte a tumsak. Thenzawlah hian puantahna kháwl 2,400 vel a awm mek a, kum tin cheng nuai 103 vel an thawk chhuak ṭhin.

NHDP hnuaia puan tahna in sak ṭanpuina hi CM Lalduhoma nupui Liansailovi'n a dawngtute hnenah a hlan a, Rs 1,20,000 cheque hlan an ni.