Aizawla veng fai ber - Republic Vengthlang
Aizawl Municipal Corporation (AMC) chuan December 21, Ningani khan AMC Auditorium-ah Faina Hapta 2023 an hman kharna inkhawm an buatsaih a, veng fai thlante leh faina lama thawk ṭhate hnenah lawmman hlàn niin, Republic Vengthlang chu veng fai ber a ni.
AMC hian October 1-8, 2023 chhung khan Faina Hapta an hmang a, hapta chhunga Aizawla veng (local council) fai thlanna an buatsaih. Veng fai bera thlan Republic Vengthlangin lawmman Rs 50,000 an dawng a, pahnihna Laipuitlangin Rs 30,000 leh pathumna Thakthing Vengin Rs 20,000 an dawng. Veng dang panga hnenah consolation prize Rs 5,000 ṭheuh hlan a ni bawk.
Bawlhhlawh thliar hrang ṭha local council pathum hnenah Rs 5,000 ṭheuh hlan a ni a, chu'ngte chu College Veng, Chawnpui leh Bethlehem Vengthlang an ni.
Faina Hapta pualin faina leh thianghlimna lama hma la ṭha mi 23 hnenah chawimawina thuchei leh Rs 2,000 ṭheuh pek a ni a; Aizawl khawlai hmunphiat (street sweeper) thawk ṭha thlan chhuah Malsawmkimi leh B Lalrinkunga hnenah thuchei leh Rs 10,000 ve ve hlan a ni bawk.
Cleanliness Week kharna inkhawm hi AMC commissioner Lalhriatpuia'n a kaihruai a; khuallian Lalrinenga Sailo, mayor chuan, Faina Hapta khar ni mah se, faina beihpui erawh khàr a nih loh thu a sawi a, faina lamah thingtlang khuate'n hma an sâwn nasat avangin ṭang lehzual turin Aizawla veng hrang hrang leh LC member-te chu a chah.
Mayor chuan, property tax chu AMC sum hmuhna pawimawh a nih thu sawiin, "15th Finance Commission aṭanga sum hmuh a tlem tial tial avangin chhiah khawn a ngai a, chhiah khawn dan hi a langtlang tur a ni," a ti a; kum 2022 chhungin property tax cheng nuai 324 hmuh niin, kumin 2023-ah nuai 573 hmuh a nih thu sawiin, "Property tax pun chhan ber chu veng hlut dan danglam ta leh mipui hmaizahna vanga rei tak a zat dik loa kalpui tawh siamṭhat a nih tâk vang a ni," a ti.
Lalrinenga Sailo chuan, in hmun laih leh phal lohna hmuna bawlhhlawh leh leivûng paih chungchangah LC-te'n thuneihna tam zawk an neih theih nan hmalak a nih thu a sawi bawk.