AR-in 2023 chhungin heroin kg. 3.663 an man tawh

Assam Rifles chuan kumin 2023 chhungin November thla tàwp thleng khan heroin (no. 4) kg. 3.663 an man tawh a, a hma kum hnih chhunga an man aiin a tam tawh zawk.

Zawhna chhanga Assam Rifles hotute sawi danin, AR-in kumin January 1 aṭanga November 30 thlenga heroin an man kg. 3.663 chu international market-ah cheng nuai 15,762 hû a ni a; kum 2021-ah kg. 1.935 manin, kum 2022 chhungin kg. 1.506 an man.

Kum 2021 leh 2022 chhunga AR-in heroin an man chu belh khawmin kg. 3.441 a ni a, kum hnih chhunga an man ai hian kumin 2023-a thla 11 chhunga man (kg. 3.663) a tam tawh zawk. Kum 2021, 2022 leh 2023 chhunga an man tawh zat chu kg. 7.104 a ni a, cheng nuai 33,428 hû a ni.

Assam Rifles hian January-November, 2023 chhungin methamphetamine mûm 7,19,224 an man a, international market-ah cheng nuai 10,495 hû a ni. Kum 2021 chhung khan mûm 27,835 manin, cheng nuai 139 hû a ni a, kum 2022 chhung khan mûm 8,85,550 an man a, cheng nuai 28,983 hû a tling.