Larsapin Mizote Krismas chibai a bûk

Governor Dr Hari Babu Kambhampati chuan Krismas leh kumthar hlim taka hmang turin Mizoram mipuite duhsakna a hlàn a; kumthar 2024-in Mizoram leh Mizote tan hmasawnna thlen ngei se a duh thu a tarlang.

Governor hian Krismas leh kumthar thuchah tichhuakin, "Krismas hi Kristiante tan hun pawimawh bik a ni a, mi tin tana hun hlimawm leh mi dang tana luan chhuahna hun a ni. Isua chuan hmangaihna, inremna leh duhsakna thuchah a rawn keng a, a zirtirna - lainatna leh dawhtheihna hi tunlai khawvêlah hian a pawimawh lehzual a ni," a ti.

Prime Minister-in kum 2047-ah India ram chu ram changkang - developed India (Viksit Bharat)-ah hlàn kai a tum thu sawiin Larsap chuan, "Khua leh tui ṭha kan nih angin India ram hi ram changkang zinga a tel ve theih nan tih tur leh chanvo kan nei vek a ni," a ti a, chuta tan chuan sorkar laipui scheme-te ṭha taka kalpui a ṭul thu a tarlang.

Governor chuan, sorkar laipui scheme-te chu mipui vantlang tana hamṭhatna leh hlâwkna tur a ni tih sawiin, "Agriculture, industry, health, social security, leh thil dang tam tak a tel. Scheme-te hi a taka kalpui a nih chuan awlsam takin hnam changkang tak ni turin kawng dik kan zawh thei dawn a ni," a ti.

Mizoram mipuiin sorkar thar an thlang chhuak tih sawiin Hari Babu Kambhampati chuan, "He sorkar thar hian hna ṭha taka a thawh theih nan duhsakna sang ber ka hlan. Kumthar hian kan hnam leh kan state tan hmasawnna hun rawn thlen sen tih hi ka duh tak zet a ni," a ti a; kum 2024 chu beisei tak leh phûr takin a thlir thu a tarlang.