KHAWTHLIR

Thisen pe

Nimin khan KṬP, Durtlang Pastor Bial chuan Synod Hospital tan thisen unit 35 an pe a, petute mipa 26 leh hmeichhia pakua an ni. ZPM Ṭhalai pawhin Civil Hospital, Aizawl Blood Bank-ah thisen unit 14 an pe a, petute mipa 11 leh hmeichhia pathum an ni.

Tanpuina sem

Mizo Post Graduate Students Union, University of Hyderabad leh Alumni member-te chuan mi harsate ṭanpuina tura an thawh khawm Rs 70,000 chu December 21, Ningani khan Aizawla veng hrang hranga chhungkaw panga hnenah an sem. University of Hyderabad-ah hian Mizo zirlai 29 an awm mek a, Alumni member 120 chuang an awm bawk.

STAM-in ngen

Science Teachers Association Mizoram (STAM) chuan nimin khan School Education leh Higher & Technical Education minister Dr Vanlalthlana an hmu a, National Institute of Technology, Mizoram dinna tur Lengpui ramah tun thlenga forest clearance tihfel a la ni lo chu tihfel thuai a nih theih nan hma la turin an ngen. STAM hian Dr Vanlalthlana lawmpuina leh STAM patron member nihna an hlan nghal a ni.

Minister-in tlawh

Commerce & Industries minister F Rodingliana chuan tun hnai khan Buarpui kawnga JNV School châwmtu tur leh tui lakna hnâr tur tuichhunchhuah laihna hmun a tlawh. Minister chuan, a rang thei ang bera tui thianghlim zawk pek chhuah a nih theih nan an mamawhte bawhzui thuai a nih tur thu a sawi.

Hmanrua sem

Disaster Management and Rehabilitation department chuan nimin khan District Disaster Management Authority hrang hrang hnenah chhiatrupna a thlen thulha hman tur hmanrua (search & rescue equipment) an sem. He hun hi DMR secretary K Lalrinzuali'n a hmanpui a, Mizoram State Disaster Management Plan 2023 a tlangzarh.