Minister pahnihin kawng enfiah
PWD minister Vanlalhlana leh Environment, Forest & Climate Change minister Lalthansanga te chuan nimin zingah khan Zemabawk Zokhawsang rama loneitute'n an huan panna kawng chungchanga harsatna an tawhte a hmunah an enfiah.
Zokhawsang rama huan leh lo neitute hian tun hmain Assam Rifles ram patlangin an feh ṭhin a, mahse, March 2022 aṭangin Assam Rifles chuan an ram paltlang an remti tawh lo. Hei vang hian a hêlna kawng siam hmangin huan/lo an pan ṭhin a, kawng a thui bakah a ṭhat loh avangin loneitute chuan Mizoram sorkarah kawng thar tâwi zawk siamsak turin ngenna an thehlut a ni.
PWD Minister chuan kan ram hi a zim ang huin kan kawng neihte hian duh thu a sam lo hle tih sawiin, "Eirukna tel miah loa kan department chan ṭheuhte hi a changtu minister-ten kan enkawl chuan kan ram hian nasa taka hma a sawn ngei kan ring a ni," a ti a, Zokhawsanga loneituten kawng chungchanga harsatna an neihte a rang thei ang bera chinfel a nih theih nan a buaipui ngai ang angte an bawhzui nghal dawn thu a sawi.
Kuthnathawktuten awlsam zawk leh hahdam zawka an thlaite an phurh zung zung theih nan agriculture link road a tam thei ang ber siam an tum thu sawiin Vanlalhlana chuan, "Chung kan kawng siamte chu a ṭha thei ang ber leh a tlo thei ang bera siam a nih theih nan a thawktute pawh kan vil uluk dâwn a ni," a ti.
Lalthansanga pawhin thu sawiin, "Helaia kuthnathawktuten an eizawnna ber huan leh lo an panna kawnga harsatna an tawh chungchang hi a tir atangin kan hriatpui a, ruling kan nih hma pawh khan theihtawpin kan lo aupui tawh a ni," a ti a, ZPM chuan kuthnathawktute chawikan hi kan ramin hma a sawn theih nana kailawn hmasa ber a ni tih an hria a, kuthnathawktuten an thawhrim rah tha taka an seng hi an duh thu a sawi.
An bial chhunga kuthnathawktuten an veivahnaa kawnga harsatna an tawk hi a mimal tak pawhin ka ngai pawimawh em em tih sawiin East-I Bialtu MLA chuan, "Heng an harsatnate hi kan hotute nen arang thei ang bera chinfel a nih theih nan hma kan la nghal dawn a ni," a ti.
Minister pahnih hi PWD Engineer-in-Chief bakah officer dangte leh loneitu aiawhte'n an ṭawiawm a; PWD Minister chuan, loneitute'n kawng thar sial sak tura an ngenna chu a theih ang anga en zui a nih tur thu a sawi.