Governor leh CM ṭanpuina hlân

Governor leh Chief Minister kaltlanga sorkar aṭanga ṭanpuina sem chhuahte nimin khan Champhai, Kolasib leh Mamit district-ahte a dawngtu turte hnenah hlan a ni.

Champhaiah chuan DC pisa kaltlangin ṭanpuina hi December 21-22 khan sem a ni. Chief Minister kaltlanga ṭanpuina chu TNT hnenah Rs 5,000, Genesaret Gospel Home-ah Rs 3,000, Gosen Home, District Hospital leh Immanuel After Care-ah Rs 2,000 ṭheuh, Rose Children Home, Metakhen leh Observation Home-ah Rs 1,500 ṭheuh hlan a ni. Governor kaltlanga ṭanpuina chu Rs 10,000 ṭheuhin TNT, Genesaret Gospel Home, Rose Children Home, Metakhen leh Gosen Home hnenah hlan a ni.

Kolasib bawrhsap John LT Sanga chuan DC conference hall-ah Governor aṭanga ṭanpuina a sem a; Thutak Nunpuitu Team (TNT), Audrene Scism Children’s Home, Omega Centre leh Enna In Boys’ Home-te hnenah Rs 10,000 ṭheuhin a hlàn.

Mamitah chuan Governor aṭanga ṭanpuina chu Buannel Children's Home, Joshua Children's Home, Observation Home leh Bethany Swadar Greh Mamit hnenah Rs 10,000 ṭheuh pek a ni a; CM kaltlanga ṭanpuina chu Buannel Home leh District Jail hnenah Rs 3,000 ve ve, Josua's Children Home leh District Hospital-ah Rs 2,000 ve ve, Observation Home leh Bethany Swadhar Greh hnenah Rs 1,000 ve ve pek a ni.