No Vehicle Zone-ah mipui an tam

Aizawla Zodin Square leh Chanmari inkara No Vehicle Zone kalpui chu vawiin chawhma dar 10 atanga tlai dar 4 thleng khan kalpui leh a ni a, mipui an thahnem hle.

Vawiin December 23 hi kumin Krismas hmaa bazar ni hnuhnung ber a ni a, Bazarpuiah mipui an thahnem hle a, kal hleih theih loh khawpin a tâwt a ni.

Hetih lai hian, pawisa leh thil bo report Market Office-in an dawng lo a, naupang an chhungte nena inhloh erawh an awm nual tih an sawi.

Bazar ni hnuhnung a nih angin khawlaia chhuakvak leh bazar tura kal an thahnem hle a, No Vehicle Zone ni hmasa ai chuan mi an tam zawk hle. Chhungkuaa chhuak pawh eng emaw zat an awm. No Vehicle Zone huam chhunga zai leh thil dang huaihawt a, thawhlawm báwm hûng an awm nual bawk.