Chief Minister Lalduhoma'n Mizoram mipui Krismas chibai a bûk

Chief minister Lalduhoma chuan Krismas thuchah tichhuakin, Mizoram mipui leh Mizo zawng zawng Krismas chibai a bûk a; dam tak leh hlim taka hmang turin duhsakna a hlan.

Chief Minister chuan hetiang hian a sawi a:

"Hunpui tluang taka kan hman theih nana sorkarin khapna a siam hrang hrangte pawh khua leh tuite'n tha taka lo zâwm turin ka ngen che u a ni.

"Dam lohna avanga damdawi-in leh inenkawlna hmun danga awm mekte pawh kan hre reng che u a, in tan kan tawngtai a ni.

"Pathianin khawvel tana thilthlawnpek a pekna ni a nih angin, mi dangte tana inpekna leh tanpui ngaite tanpui duhna thinlung pu chunga Krismas hmang turin ka sáwm che u a, a pe thinte hnenah pawh lawmthu ka sawi a ni. Kan inpeizàwn liam liam hian chhungkua leh khawtlang nuam kan siam thin a, inngaihsak tawnna hian inrintawnna min pe a, inrintawnna chuan kawng hrang hrangin rah tha a chhuah thin a ni.

"Pathian leh khawvel inrem lehna ni a nih angin, mi tinin inunauna leh inremna chawisang thar leh ila, hnam hrang hrang chenna ram lian taka awm kan nih avangin mipui inpumkhatna hian chakna thahrui min pe a ni.

"Pathian leh ram mipui zarah sorkar thar kan nei a; he sorkar a lo pian theih nana kan auhla langsar ber pakhat chu 'Ram rorelnaah Pathian ram lo thleng rawh se' tih hi a ni. Pathian ram a lo thlen theih nan hian Tawngtai Pawl pawh kan din a, hmalak dan turte pawh uluk takin kan buatsaih a ni. Kalphung thar mipui sorkar leh mi tin huapzo din a, Pathian duh dan ang ngeia sorkarna kalpui kan tum a, kan beisei dinhmun kan thlen theih nan, mahni zawn theuha sorkar lo thawhpui zel turin ka sawm che u a ni.

"Pathian ram lo thlenna dâltu lian tak pakhat kan hmachhawn mek chu ruihhlo a ni a, tunah ngei pawh hian kan thalai za tam takte ruihhlo bawihah táng mekin, nu leh pa tam takte lungngaiin an kaikûn mek a ni. Chuvang chuan kan sorkar hian ruihhlo dona leh ruihhlo bâwiha táng mekte chhanchhuahna hi a ngai pawimawh em em a, mimal tak pawhin ka vei em em a ni. Lak luh ka nih ni là lã khan; kan chenna in pawh pan hmasa loin Tawngtai Bethel Camping Centre, Sakawrtuichhun ka pan nghal a. Ruihhlo bawiha táng mek kan thalaite ka tlawh nghal nghe nghe a ni. Anni hote chhanchhuak tur leh ruihhlo bawiha táng zel turte venghim turin sorkar chuan hma a la dawn a, mi tinte thawhpuina pawh ka ngen tak meuh a ni.

"Kan hunpui Krismas leh kumthar pawh hi zu, ruihhlo leh nulat tlangval nawmchenna lama tlûk nan thalaite'n kan hmang ral mai mai ang tih ka hlau hle a, chutiang nunkawng tha lo lakah chuan invawng him tlat ang u.

"Pathianin min veng ang a, kan hma lawkah kum thar kan chuangkai dawn a. He kum thar hi in tan kum tha, malsawmna tam tak in dawn kum a nih theih nan duhsakna ka hlan a che u.

Kumthar a nih angin thinlung thar nen hmalam thlir ila, nun hlui tha lo, paih ngai kan neih apiangte paihin, thil tha lo kan chunga lo thleng tawhte pawh inbawhbehtir hek loin, beiseina thar nen hma lam i pan zel ang u."