Krismas hlim taka lawm a ni

Vawiin December 25, 2023 hi Isua Krista pian ní, Krismas a ni a, Mizorama kohhran hrang hrangte'n hlim takin an lawm.

Krismas ní-ah hian kohhran hrang hrangte chu chawhma aṭangin an inkhawm a, kohhran hmunpui lam aṭanga thupui awm sa behchhanin Pathian thuchah an ngaithla hlawm. Kohhran eng emaw zat chuan chawhma inkhawm bànah Krismas lawm nan thingpui leh a hmeh an changho a ni.

Kohhran ṭhenkhat chuan vawiin tlai khan Krismas lawmna ruai an ṭheh a, chu'ng zingah chuan UPC leh Salvation Army tualchhung kohhran ṭhenkhatte an tel bakah, naktuka ruai nawn tur an awm. Presbyterian Kohhran leh Baptist Kohhrante chuan naktuk December 26 hian Krismas ruai an ṭheh ang.

Mizoram páwna Mizo kohhrante leh inkhawmte pawhin hlim takin Krismas an hmang a, Krismas lawmna ruai pawh an ṭheh nghal hlawm a ni.