Sports Minister-in khelmual siam mek 2 a enfiah

Sports & Youth Services minister Lalnghinglova Hmar te chuan vawiin zingah khan Zembawk Football Field siam mek a enfiah a, Minister leh Aizawl East-I bialtu MLA Lalthansanga'n a tawiawm.

Sports Minister chuan, Mizorama football khelmual zingah standard size tling pha a tam lo tih sawiin, "Standard size a nih loh chuan national tournament-te duh angin kan thleng thei lo. National level inelna a tam thei an ber thlen theih kan duh a, chumi atana pawimawh ber standard size football field kan neih tam hi a ni," a ti a; national level inelna thleng thei tur chuan mikhual riahna tur neih that a ngaih thu a sawi.

Zemabawk Field ennaah hian khawtlang hruaitute chuan tuna football field siam mek metre 92X52 chu a zìm deuh avangin standard football ground size metre 100X65 anga siam theih dan kawng awmte chu SYS Minister an sawipui a ni.

Lalnghinglova Hmar chuan, khelmual zuah thei dan kawng dap ni se a ti a, khelmual sakna tur sum tumtu Aizawl Smart City Ltd. hotute chu a thei anga anga hma lo la turin a chah.

Sports Minister hian Edenthar Venga football field siam mek a hmunah a en bawk a, tuna siam mek chu a zìm deuh avangin zauh hret theih dan tur a hmunah an enho a ni.

Zembawk Football Field siam hna hi NECS-in an thawk a, Edenthar Veng Football Field siam mek chu Vinco Construction thawh a ni thung. Khelmual pahnihte hi Aizawl Smart City Ltd. sum hmanga thawh a ni.

Sports Minister hi Aizawl Smart City Ltd hotute, Mizoram State Sports Council hotute leh Mizoram Football Association (MFA) hruaitute'n an tawiawm.