AR-in kuminah ruihhlo cheng vbc. 956.65 hù leh kuhva rah cheng vbc. 47.31 hù an man tawh

Assam Rifles chuan kumin 2023 chhungin December 25 thleng khan ruihhlo chi hrang hrang cheng vbc. 956.65 hù leh dan loa ram dang atanga kuhva rah lak luh cheng vbc. 47.31 hù an man.

Assam Rifles atanga thu dawn danin, AR hian January 1 - December 25, 2023 chhungin ruihhlo chi ruk manin, cheng vbc. 956.65 hù a tling a; ruihhlo man zingah heroin tam berin kg. 33.20 an man a, Rs 5,46,62,99,200 hù a ni. Methamphetamine mûm 12,17,524 an man a, Rs 3,39,36,61,800 hù a tling.

Opium kg. 3 (Rs 1,80,000 hù), ganja kg 25.950 (Rs 18,48,900 hù), poppy seed kg. 20.540 (Rs 53,04,000 hù) leh Troprolidine mûm 98,000 (Rs 9,80,00,000 hù) an man bawk.

AR sipaite chuan kuminah December 25 thlengin Myanmar atanga dan loa lak luh kuhva rah quintal 681.03 an man tawh a, Rs 47,31,05,500 hù a tling. Ram dang meizial báwmpui (case) 4,134 man tawhin, Rs 47,79,50,315 hù a ni a; ram dang zu báwm (case) 2,953 an man tawh a, Rs 1,26,77,416 hù a ni.