AMC-in 2023-24 budget revised estimate cheng nuai 11,731.81 a pawm

Aizawl Municipal Corporation (AMC) Board of Corporators (BoC) vawiin 28.12.2023-a thukhawm chuan 2022-24 AMC budget revised estimate (RE) cheng nuai 11,731.81 an pawm.

Aizawl mayor Lalrinenga Sailo kaihhruai BoC meeting-ah hian Executive Corporators (Cash & Accounts) Lalringliana'n AMC budget revised estimate a pharh a, a sawifiah nghal. Kum tira budget estimate chu cheng nuai 11,479 a nih thu te, RE chu BE aiin cheng nuai 252-in a tam zawk thu a sawi a, AMC-in thawh chhuah a pun zel thu a sawi.

AMC budget RE-ah hian mipuite'n awlsam zawka online hmanga Property Tax an pek theihna tur Property Tax Management Software (PTMS) peih a nih thu leh hei mipui tan chhiah pek a awlsam sawt beisei a nih thute tarlan a ni.

AMC revised estimate 2023-24 ah hian budget atang 81% chu khawpui hmasawnna hrang hrang thawhna atan hman a ni tih tarlan a ni a. A bâng 18.8% chu AMC inrêlbàwlna - thawktute leh corporator-te hlawh leh hamthatna leh inrelbawlna atan te, local council lawmman atante hman a nih thu tarlan a ni bawk.

AMC sum hmanna lian zual tarlante chu - Aizawl khawpui bawlhhlawh lak khawmna atan te, tui leh a kaihhnawih atan te, corporator ward development fund atan te, LC kaltlanga veng chhung hmasawnna atana te, street light chhit mante a ni. Aizawl Day 2024 hmanna tur sum dah a nih thu tarlan a ni bawk.

AMC hi mahni intodelh tur a nih avangin central leh state sorkar suma innghat mai loa chhiah leh thil dang a lak khawm hmanga intodelh tura tih a nih thu AMC hotute chuan an sawi. Financial year kal meka sum thawh chhuah chu kum dang aia a tam thu leh cheng nuai 1001 a nih thu tarlan a ni.

Financial year 2023-24 chhungin sorkar laipui atangin cheng nuai 6,564 dawn beisei a ni a, state sorkar atangin cheng nuai 2,324 dawn beisei a ni.

AMC BoC meeting chuan corporator zinga MLA-a tling thar Baryl Vanneihsangi chu lawmpuina an hlan a; Lalduhoma kaihhruai state sorkar thar chu lawmpuina an hlan bawk.