Infiammite leh NE Olympic kan ngai pawimawh hmasa dawn - Sports Minister

8th Mizoram State Sports Council chuan vawiin khan MSSC Conference Hall, Hawla Indoor Stadium-ah General Body Meeting an nei a; MSSC president leh Sports minister Lalnghinglova Hmar chuan, infiammite an ngaih pawimawh hmasak dawn thu leh inelnaah chuan Nagaland-a neih tur North East Olympic Games an ngaih pawimawh hmasak dawn thu a sawi.

Lalnghinglova Hmar chuan, "Infiammite ngaih pawimawh hmasak a ni dawn a, sport association-in an dawt ang. Infiamna hrang hrangah medal kan ngai pawimawh ber bawk ang," a ti.

Kum 2024-a Nagaland state-in North East Olympic Games a thlen tur chu ngaih pawimawh a nih dawn thu leh chumi dawtah chuan National Games an ngaih pawimawh dawn thu a sawi a, "Engah hian nge medal a hnaiha a hlat tih hi kan ngaih pawimawh a ngai. Chumi atan chuan coach education kan ngai pawimawh ang. Mizoram hi coach lamah a la hniam a, kum thar atang chuan coach-te rilru leh taksaah an fit tur a ni," a ti a, coach chuan coaching an pe tur a ni a, thil dang an ti tur a ni lo tih a sawi.

Sport Minister chuan, sorkarin sum a nei lo chungin sport association-te national-a medal an dawn ang zelin sport incentive an dawn dawn thu a sawi a; sorkar hmasain sport infrastructure an siamte chu an hman tangkai dawn te, sports infrastructure siam dawnah sport association an ràwn zel dawn thu te, kum 2036-a India-in Olympic a thlen turah Mizo an tel ngei theih nan thawhho that a tul thute a sawi bawk.

MSSC General Body Meeting-ah hian sport association 33 atangin aiawh an tel a, MSSC President kaihhruaiin sport association-tehmalakna tur hrang hrang sawiho a ni.