Thisen pek inzirtirna atana kea km. 21,000 kal tumin CM a kâwm

Thisen pek uar tura mipui zirtir paha kea kal kual mek Kiran Verma, Simply Blood dintu chuan vawiin 28.12.2023 khan chief minister Lalduhoma a pisaah a hmu a; CM chuan a kal zelna turah duhsakna a lo hlan.

CM Lalduhoma leh Kiran Verma hian a thlàwna thisen pek chungchanga Mizoram leh India ram state dang dinhmun an sawi dun a; Verma chuan Mizoram leh Tripura state-in district tinah blood bank an neih avangin a thlàwna thisen pek dinhmun a tha nia a hriat thu a sawi.

Kiran Verma hian kein India ram a fang mek a, km. 21,000 kal a tum. Kum hnih kal ta, December 28, 2021 khan Thiruvananthapuram atangin a kal tan a ni. A thupui ber chu 'Thisen dawn tur neih loh vangin tu mah December 2025 hnu lamah an thi tur a ni lo' tih a ni. Mizoram atangin Tripura a pan leh ang.