Khaw chhung kawng ngai pawimawh hmasa turin CM-in Pushpak hotute a hrilh

Chief minister Lalduhoma chuan vawiin 28.12.2023 khan a pisaah Project Pushpak chief engineer SP Kolipey leh a thawhpuite Mizorama kawng an siam chungchang a sawipui a; kawng an siama an hnathawhnain a paltlang khaw chhung kawngte ngai pawimawh hmasa zel turin a chah.

Inkawmnaah hian Project Pushpak-in Mizorama hna an thawh mekte chipchiar takin a lem nena thlir chungin an sawifiah a; kawng an enkawl mek hmun thenkhata Mizoram PWD enkawl kawng tlazepte chu an kuta hlan ni thei se, an tan hnathawh a awlsam zawk bakah a chhawrtu mipui tan a tha zawk tura an ngaih thu an sawi.

Pushpak hotute chuan, km 58-a thui Champhai-Dungtlang kawng te, km 124-a thui Dungtlang-North Vanlaiphai via Thekte kawngte chu an kutah awm thei se an duh thu an sawi a; Sairang-Tuipuibari inkar kawng an enkawla PWD kawng tlazep chu an kutah hlan theih ni se tha an tih thu an sawi bawk.

Chief Minister chuan, kawng enkawltute zawng zawngin an hnathawhnain a paltlang khaw chhung kawngte ngai pawimawh hmasa zel se a duh thu a sawi a; Mizorama kawng siamtu - Project Pushpak, NHIDCL leh PWD-te inkarah inelna thianghlim awm se a duh thu a sawi bawk.

CM Lalduhoma hian Project Pushpak hotute chu an duh dante ziaka a hnena thehlut turin a chah a ni.

Project Pushpak hotute sawi danin, Mizoramah kawng 10 an enkawl mek a, chu'ng zinga pali chu an thawk zo tawh a, a dang pali chu thawh mek niin, pahnih dang chu lei (bridge) dawh tur awm avangin nghah rih (pending) a ni.