Hunpui vuakvetah mi 1,359 man tawh; Hâlpuah khapnaah police an khauh dawn

Mizoram Police chuan December 11, 2023 atanga special drive an kalpui chhungin dan bawhchhia mi 1,359 pawisa an chawitir tawh. Hâlpuah khapna thupek khauh taka an kenkawh dawn thu an tarlang.

Police thuchhuah chuan, boruak muanawm tak hnuaia hunpui hman a nih theih nan theihtawpin hma an la tih an tarlang a, "District tinah ruahmanna uluk taka siamin special drives neih a ni a, a bikin rui chunga lirthei khalh leh mi dang tana hlauhawma lirthei khalh lakah 11.12.2023 aṭang khan beihpui thlak a ni," an ti.

Police thuchhuah tarlan danin, police-in beihpui an thlak chinah dan bawhchhia mi 1,359 chu pawisa an chawitir tawh a, chu'ng mite pawisa chawi tling khawm chu Rs 12,44,050 a ni.

Mizoram Police chuan, mipui zawng zawng rui chunga lirthei khalh lo tur leh ke hnih nei khalhte chu helmet khum ngei turin an chah a, "Kumthar lo thleng turah khapna thuchhuah siam tawh angin mipui leh vantlang himna atan halpuah leh puak thei thil dang khapna pawh khauh taka kalpui a ni dawn tih kan inhriattir a ni," an ti.

Halpuah khapna hnuaiah thubuai panga ziah luh tawh a ni a, mi pasarih an man tawh tih an tarlang bawk.

Mizoram Police chuan mipui vantlang himna atana sorkarin inkhuahkhirhna dan a siamte ṭha taka zàwm a, dan leh thupek kengkawhtu police leh tlawmngai pawlte ṭha taka thláwp turin mi tin an ngen a ni.