Hàlpuah hâltu man nei lo

December 31, 2023, Pathianni zan khan kum hlui thlahna leh kum thar lawmna atan Aizawl khawpuiah nasa takin hàlpuah hàl a ni a, police-te'n halpuah hâltu man an nei lo nia thu dawn a ni.

Mizoram sorkar chuan kum 2023 thlahna leh kum 2024 lawmna atan halpuah leh a kaihhnawih dangte khap turin a rel a, district hrang hrangah district magistrate ten khapna thupek an chhuah. Police-te chuan Krismas hma khan hâlpuah eng emaw zat chu an lo man tawh a, halpuah hal lo tura ngennate an lo tichhuak tawh a ni.

Police hotute hnen atanga thu dawn danin, Mizoramah halpuah, halmawi leh a kaihhnawih dangte khap ni mah se, December 31, 2023 zan khan kum 2023 thlahna leh kum thar 2024 lawmna atan Aizawl khawpuiah nasa takin halpuah hal a ni a, mahse, police-te chuan halpuah haltu man an nei lo. Halpuah erawh báwm (case) 4 vel an man thung.

Police-te hian kum hlui thlah zan khan Aizawl khawpuiah ngawrh takin venhim hna an thawk a, hmun thenkhatah daidanna (barricade) siamin, a tul angin lirthei tlante an enfiah thin a ni.