Kohhrante'n kum thar 2024 an lawm; Republic Vengin ruai an theh dawn lo

Mizorama kohhran hrang hrangte chuan vawiin January 1, 2024 hian kum thar an lawm. Kohhran tam takin vawiin khan kum thar lawmna ruai an theh a, naktukah kohhran eng emaw zatin ruai an theh ve leh ang.

Kum thar lawmna atan hian kohhran hrang hrangte chuan vawiin khan Pathian biak inkhawm an nei a, Pathian thuchah an ngaithla. Inkhawmah kum thar lawmna atana thingpui ruai theh eng emaw zat an awm.

Kum thar lawmna atan hian Aizawl páwn lama kohhran tam tak chuan vawiin khan tlaiah ruai an theh a, hlim takin hun an hmang. Aizawlah chuan kohhran pawl thenkhatin ruai an theh laiin, naktuka theh tur pawh an awm a; kohhran lian ber Presbyterian Kohhrana tualchhung kohhran tam ber chuan naktukah ruai an theh dawn. Vawiina ruai theh a, naktuka nawn tur an awm bawk.

Mizoram páwna kohhrante leh Mizo inkhawmte pawhin vawiin khan kum thar lawmna ruai hlim takin an theh hlawm a ni.

Hetih lai hian, Mizorama tualchhung kohhran lian pawl, Republic Veng Presbyterian Kohhran chuan kumin hian kum thar lawm nan ruai an theh dawn lo a, vawiin chawhma inkhawmah thingpui ruai an theh thung. Republic Veng Kohhran hian Janaury 26, 2024 hian an kohhran kum 60-na, diamond jubilee an lawm dawn a ni.