Mizorama rawn tlanchhia Myanmar sipai 151-te phurh haw an ni

Myanmar sipai 151, an camp Arakan Army-te'n December 28, 2023-ah an lak avanga December 29-a Lawngtlai district chhung, Tuisentlanga Assam Rifles hmuna tlanchhe lutte chu vawiin chawhnu lam khan Myanmar thlawhna hmangin Lengpui Airport atangin an ram lamah hruai haw an ni.

Thu dawn danin, Myanmar sipaite hi Myanmar sorkar rawn tirh thlawhtheihnain tum hnih a rawn phur chhuak a; a tum khatnaah sipai 84 phur hawin, a tum hnihnaah chawhnu dar 3:25 khan sipai 67 a rawn phur chhuak leh a ni.

Heti hian December 29, 2023-a Myanmar sipai Mizorama rawn tlanchhe lut, Tuisentlang AR camp-a tlu lutte chu phurh haw kim an ni a; an zingah hliam mi pakua an awm a, chu'ng zingah chuan hliam na zual mi pali an awm.

Myanmar sipaite hi an ram chhunga an awmna hmun, Myeik Wa Camp an tih mai chu December 28 khan Arakan Army ten beiin an luhchhuah a, camp chu Mizoram tàwpa Parva ep maia awm a ni. An camp chhuhsak an nih avangin Myanmar sipaite chu an tlanchhia a, December 29 khan Tuisentlang khuaah an lut a ni. A tirah mi 83 an rawn lut phawt a, zan lamah mi 68 an rawn lut leh bawk a, an vaiin mi 151 an ni. Ralthuam eng emaw zat an rawn luhpui bawk.

MYANMAR SIPAITE'N RALTHUAM AN RAWN LUHPUITE

1. Rifle - 93

2. Pistol - 17

3. Rocket Propelled Grenade (RPG) - 4

4. Mortar - 4

5. Medium Machine Gun (MMG) - 2

6. Light Machine Gun (LMG) - 5

7. Sniper rifle - 4

8. Hand grenade - 374