Police-in hàlpuah hâltu man an nei lo ; December 31 zanah 2022 aiin 2023-ah Aizawl boruak a lêtin a bawlhhlawh zawk

December 31, 2023 zan khan kum hlui thlahna leh kum thar lawmna atan Aizawl khawpuiah nasa takin hàlpuah hàl a ni a, Aizawl boruak tehnaah December 31, 2022 zan aiin a lêtin boruak a bawlhhlawh zawk. Mizoramah halpuah leh a kaihhnawih thilte hâl khap a ni chungin sorkar thuneitute'n halpuah hâltu man an nei lo.

Mizoram sorkar chuan kum 2023 thlahna leh kum 2024 lawmna vuakvetah halpuah leh a kaihhnawih dangte khap a rél a, November 2023 khan district hrang hrangah district magistrate-te'n khapna thupek an chhuah. Police-te chuan Krismas hma khan hâlpuah eng emaw zat chu an lo man tawh a, halpuah hâl lo tura ngennate an lo tichhuak tawh bawk.

Police hotute aṭanga thu dawn danin, December 31, 2023 zan khan Aizawl khawpuiah nasa takin halpuah hâl a ni chungin police-te chuan halpuah hâltu man an nei lo a, halpuah báwm (case) li vel an man thung.

Hetih lai hian, Mizoram Pollution Control Board (MPCB)-in boruak dinhmun an tehnaa a lan danin, kum hlui thlah zan (December 31) bikah kum 2023 khan kum 2022 aiin Aizawl khawpuiah a lêtin boruak a bawlhhlawh zawk.

MPCB hian Sikulpuikawnah Continuous/Automatic Air Quality Monitoring Station an bun a, Air Quality Monitoring Station-in a chhinchhiah danin, bawlhhlawh nawi khu léng vel (PM10) chu December 31, 2023 chhun lamah chawhrualin 6µg/m3 (meter biala microgram) a nih laiin, zanlai dar l2-1 inkar, hâlpuah hâl vanglaiah chuan 597µg/m3 a tling.

December 31, 2023 zana bawlhhlawh nawi léng vel 597µg/m3 chu kum hmasa December 31, 2022 zanlai dar 12-1 inkara teh chhuah zat 285 µg/m3 aiin a lêt chuangin a sang zawk a; "Kum hmasa aiin halpuah leh halmawi kan hâl nasa hle tihna a ni," MPCB chuan an ti.

Boruaka bawlhhlawh nâwi léng zinga tê zual leh hlau-hawm zual, taksa chhung rila chuap leh thisena kaltlang thei (PM2.5) pawh December 31, 2023 chhunah 2.82µg/m3 a nih laiin zanlai dar 12-1 inkar, halpuah hàl vanglai hunah chuan 290.2µg/m3 a kai. Kum hmasa (December 31, 2022) zanlai velah khan 67µg/m3 a ni a, kum hmasa aiin kuminah a lêt li chuangin a sang zawk a ni.

December 31, 2023 zana hâlpuah hâl vangin boruak a bawlhhlawh phah nasa tih tarlangin MPCB chuan, "National standards (pawm theih chin) 50µg/m3 a pèl nasa hle a, Air Quality Index stage 6 awmah a hlauhawm ber stage 6 (Severe = 400 aia sang) a kai pha a ni," an ti.

MPCB chuan, December 31 zana hâlpuah hâl zawh hlimah khan boruak a bawlhhlawh hle tih tarlangin, "Mihring hrisel pangngai tan pawha hlauhawm tham a ni a, natna nei sate'n an tuar zual dawn," an ti a; halpuah hâl vanga natna zual phah an awm chuan inhriattir theih ni se an duh thu an tarlang.

Mizoram mipuite inngaihtuah chiang tura chahin MPCB chuan, "Halpuah leh halmawi hâl chhung chu darkar khat vel chauh a lawm tiin ngaihtuahna kan nei a nih chuan, he darkar khat chhung hian thaw loa kan awm theih loh avangin engtiang fakaua tam nge bawlhhlawh leh túr hlauhawm kan hìp luh ang tih kan ngaihtuah tel a, a hnua kan hriselna a nghawng theih dan tur kan hriat tel a, halpuah leh halmawi hmanga kan boruak tibawlhhlawh lo tura hma kan lak a ṭul tak zet a ni," an ti.