Covid-19 frontline worker zinga 80% vel NHM hnuaia thawk an ni
National Health Mission (NHM) hnuaia thawkte chuan, tunlaia Covid-19 chungchanga hmalaknaah Health department aṭanga a tak taka thawk zinga a tam ber chu NHM hnuaia thawkte an nih thu an sawi. Chutih laiin, a hmatáwng (frontline)-a thawkte mipui aṭanga demna lam hawi thu hriat tur a awm ṭhin leh hlawh la tura nawr chhuah zel a ngai chu hrehawm an tih thu an sawi.
Vanglaini palai zawhna chhangin NHM hnuaia thawkte chuan, tun dinhmunah Covid-19 kaihhnawiha thawktu zinga 80% vel chu NHM hnuaia thawkte an nih thu an sawi a, "Swab sample latu te, quarantine centre viltu te, Covid-19 veite enkawlna (dedicated covid health centre leh covid care centre)-a Covid-19 vei enkawltute leh hmun hrang hranga thawktu tam ber chu NHM hnuaia thawkte kan ni a, regular-a thawk chu mi tlémtê an ni," an ti.
Frontline worker zingah tun hnaiah hripui kai an awm nual tâk thu leh, chu'ng mite zinga ṭhenkhat chu NHM hnuaia thawkte an nih thu sawiin, "Hetih lai hian, senso ngaite mahnia intum vek a ngai. Senso kan tih hi damdawi-ina awm man te, sample test-na mante leh thil dangte a ni. Mahni intum a ngai tih kan hriat hian kan ngaihdan a ni lo hle. Sorkarin a hmatáwngah min hmang a, hengte hi chu min free ve turah kan ngai," tiin an sawi.
An dinhmun chu Covid-19 Medical Operation Team chairman Dr ZR Thiamsanga, MLA hnenah Champhaia a awm laiin phone hmangin an hrilh a, mahni intum ngai loa tih dan tur kawng zawnpui a tum thu a lo hrilh niin an sawi. Chutih laiin Dr ZR Thiamsanga chuan Vanglaini palai zawhna chhángin, NHM-a thawk pawl hruaitute'n an biak a hriat loh thu a sawi thung.
NHM-a thawkte zingah hripui kai an awm a, mipui aṭangin demna thâwm a awm ṭhin pawi an tih thu sawiin NHM-a thawkte chuan, "Chutiang karah chuan a hun takah hlawh kan la thei lo leh zel a, nawr chhuah zel a ngai a, hrehawm kan ti hle a ni," an ti a; chutih rualin, an hlawh chu tunlai hian an account-ah a luh mek thu an sawi bawk. NHM-a thawkte sawi danin, Supreme Court-in thupek a chhuahah, Covid-19 donaa a hmatáwnga ṭangte reng reng chu an hlawh hrènsak phal a ni lo a, a hun takah pek zat zat tur tih a ni. Mizorama NHM hnuaia thawk zingah kum 20 vel thawk tawh te, kum 10 chuang thawk tawhte eng emaw zat an awm a; chutih laiin, sorkar laipuiin kaihhruaina a siamah chuan, NHM hnuaia kum nga thawk tling tawhte chu dah ngheh tura tih a ni.